Зошто прво да не почнеме од она во што сме добри, наместо веднаш да се фокусираме на слабостите? Начинот на кој пристапуваме е навистина важен. Професионалците и наставниците навистина сакаат да помогнат, но понекогаш, и со најдобра намера, знаат да тргнат од погрешна насока. Зошто прво да се гледаат слабостите, кога младите со потешкотии во учењето имаат толку многу силни страни што можат да ги понудат?
Најчесто работата со млади со различни потреби во учењето започнува со она што им е тешко и со тоа што треба да го подобрат. Но што ако го смениме тој пристап? Што ако наместо тоа, младите прво почнат да ги откриваат своите силни страни, а потоа преку нив природно да работат и на предизвиците?
Токму ова го нуди Skill Compass – поинаков начин на размислување, каде што се почнува од она што младите можат да го направат, наместо од она што им е тешко. Идејата е едноставна, но многу моќна: секој човек има силни страни и тие треба да бидат првата точка од која се почнува.
На веб-страницата cskill.eu се наоѓа дигитална алатка наречена „Картички за откривање на силни страни“ (Strengths Discovery Cards). Таа им помага на младите да ги препознаат своите способности на едноставен и достапен начин. Оваа алатка е посебна затоа што ја менува почетната перспектива – наместо да се прашуваме „што не ми оди“, таа нè води кон прашањето „во што сум добар/добра“.
Како функционираат картичките?
Секоја картичка има кратка, јасна порака и визуелен приказ на одредена силна страна. Корисникот се повикува да ја поврзе таа порака со сопствено искуство.
На пример, една картичка вели: „Можам брзо да смислам многу идеи.“ Потоа корисникот се поттикнува да се сети на вистинска ситуација кога ја покажал оваа способност. Можеби на училиште, при работа на проект или во секојдневен проблем што успеал да го реши. Така, преку лично искуство, младите почнуваат да ги препознаваат своите силни страни и да градат поголема самодоверба.
Со текот на времето, ова не само што ја зголемува свесноста за сопствените способности, туку помага и во градење на позитивна слика за себе – нешто што е клучно за личен и професионален развој.
Картичките за откривање на силни страни носат нова перспектива и за учениците и за наставниците и кариерните советници. Тие не се само алатка, туку начин на размислување – пристап кој го гради патот кон успехот преку силните страни, а не преку недостатоците.
Оваа алатка е развиена во рамки на проектот Skill Compass: Empowering Youth with Learning Differences through Career Guidance Tools, кофинансиран од Европската Унија и спроведен од партнерите од Бугарија, Србија и Чешка, заедно со Creative House и други организации посветени на поддршка на младите.
Оригиналниот текст е објавен на EPALE
Прочитај повеќе: Силните страни пред слабостите
